حضرت نظام الدین ؒ کے عرس،کے موقع پر بھارت نے پاکستانی زائرین کو اب تک ویزےجاری نہیں کئے
لاہور: حضرت نظام الدین اولیاؒ کے 720 ویں سالانہ عرس میں شرکت کے لیے بھارتی حکومت کی طرف سے ابھی تک پاکستانی زائرین کو ویزے جاری نہیں کئے۔
عرس کی تقریبات بھارتی دارالحکومت میں آج (28 اکتوبر) سے شروع ہورہی ہیں جو 5 نومبر تک جاری رہیں گی۔
عرس میں شرکت کے لیے 250 پاکستانی زائرین کو آج واہگہ کے راستے بھارت جانا تھا لیکن انہیں ابھی تک بھارتی ہائی کمیشن کی طرف سے پاکستانی زائرین کو ویزا نہیں مل سکا ہے۔
پاکستانی زائرین ہر سال وزارت مذہبی امور وبین المذاہب ہم آہنگی کے ذریعے درخواستیں جمع کرواتے ہیں۔
درخواست دہندگان کو ہدایت جاری کی گئی تھی کہ وہ حاجی کیمپ لاہور سے اپنی سفری دستاویزات وصول کرلیں۔ تاہم گزشتہ روز زائرین کی بڑی تعداد حاجی کیمپ لاہور میں پہنچ کر رات گئے تک پاسپورٹ ملنے کا انتظار کرتی رہی لیکن بھارتی ہائی کمیشن کی طرف سے ویزا پاسپورٹ واپس نہیں بھیجے گئے۔
ایکسپریس نیوز کے مطابق، پاکستانی فاقی وزارت مذہبی امورکا کہنا ہے کہ زائرین کے ویزوں کے حوالے سے وزارت خارجہ کے توسط سے بھارتی سفارتخانے سے رابطہ کیا گیا ہے لیکن ابھی تک بھارتی سفارتخانے نے پاکستانی زائرین کو ویزے دینے یا ان کی درخواستیں مسترد ہونے سے متعلق کچھ نہیں بتایا ہے۔
حکام کے مطابق آج ہفتہ کی چھٹی کے باوجود وہ بھارتی سفارتخانے سے رابطہ کریں گے۔
تمام پاکستانی زائرین کو پیغام پہنچایا جارہا ہے کہ ابھی حاجی کیمپ لاہور نہ پہنچیں۔جب ویزے مل جائیں گے تو تمام زائرین کو بذریعہ ایس ایم ایس مطلع کردیا جائے گا۔
اُدھر بھارتی سفارتخانے کے ذرائع نے بتایا کہ انہیں ابھی تک پاکستانی زائرین کو ویزے دینے سے متعلق نئی دہلی سے اجازت اور ہدایات نہیں مل سکیں ہیں۔
یہ بھی پڑھیں
سال2023کا دوسرا اور آخری چاند گرہن
کمبوڈیا کا نیا اور سب سے بڑا ہوائی اڈہ سیم ریپ میں کھل گیا
پاکستان سے افغان مہاجرین کو لانے والی پہلی پرواز برطانیہ پہنچ گئی
واضح رہے کہ 1974ء کے پاک بھارت مذہبی سیاحت کے معاہدے کے تحت، بھارت حضرت نظام الدین اولیاؒ کے عرس میں شرکت کے لیے 250 پاکستانی زائرین کو ویزے دینے کا پابند ہے لیکن بھارتی سفارتخانے کی طرف سے پاکستانی زائرین کو ویزے فراہم کرنے میں اکثر تاخیر ہوتی ہے یا پھر عین موقع پر ویزے جاری کرنے سے انکار کر دیا جاتا ہے۔
دوسری جانب پاکستان 1974ء کے پاک بھارت مذہبی سیاحت کے معاہدے کے تحت، اس سال نومبر میں 3 ہزار بھارتی سکھ یاتریوں کو باباگورونانک دیو جی کے جنم دن کی تقریبات میں شرکت کے لیے ویزے جاری کرے گا۔
